給單親父母的文章 單親, 生活

jacko

以下那段留言，是由一位單親媽媽寫的。如果您也是單親媽媽或爸爸的話，它可能會給您一點啟發！

單親？駛咩驚 ~

之前我係睇多，好小回。最近留意到好多post都係唔開心 / 好嬲個男人點解咁對自己，點解佢仍過得咁好……其實最大原因都只係自己放唔低(仲愛佢)、唔忿氣(佢點解咁對自己)，因而令到自己每日都以淚洗面。

我做咗單親媽咪差唔多7年。呢7年有苦有樂，但大部份時間我都係笑住過。就算有任何唔開心，都會俾一個限期自己，發洩完就要重新上路。講真，唔分開都分開咗，咩原因已經唔重要。邊個啱邊個錯亦都唔重要，呢個已經係一個事實，只可以接受，就算你喊盲隻眼都唔會改變到個事實，反而會影響到自己嘅小朋友。

我好記得幼稚園有個老師同我講，我小朋友同其他單親嘅小朋友好唔同。佢好樂天，當有人問佢點解冇爸爸，佢會講：「我唔係冇，佢只係唔同我地一齊住，因為佢同媽咪分開咗。」。相反，見到有啲小朋友真係好閃縮。所以，首先要唔好自己睇唔起自己，既然個天安排咗我地行呢條路，笑要行，喊都係要行，點解唔選擇開心啲去行？呢個世界冇話冇咗邊個唔得架 (呢一刻對我嚟講冇咗個仔就真係唔得 )。最重要我地一日未死，你點知冇機會遇到真正嘅真命天子，可能比之前那個好一百倍呢！與其浪費精神去嬲一個人，浪費時間睇佢幾時有報應，不如將啲時間同小朋友建立更深既親子關係。

無論係咪單親，日子都係要過，只係睇你選擇點過。



您又會選擇如何過日後的生活呢？

s0904217

這位單親媽媽真是很樂觀，很有鼓勵性。無錯有些事情就算你不想它發生，但它已經發生了。問題是我們自己是否接受？這位家長很聰明，她接受了，所以可以好好的與囝囝繼續生活下去！否則，世界上便會多了一個經常愁眉苦臉和怨天尤人的家長，另外，也多了一個心事重重和鬱鬱寡歡的小朋友，相信這就是身教的果效了。